എയര്‍ ഇന്ത്യ പൈലറ്റുമാര്‍ പണിമുടക്കുന്നു

ആനുകൂല്യങ്ങള്‍ വെട്ടിക്കുറയ്ക്കാന്‍ തീരുമാനിച്ചതിനെതുടര്‍ന്ന് എയര്‍ ഇന്ത്യയിലെ പൈലറ്റുമാര്‍ പണിമുടക്കുന്നു. ഇന്ന് അര്‍ധരാത്രിമുതലാണ് പണിമുടക്കുപ്രഖ്യാപിച്ചിട്ടുള്ളത്. 400 ഓളം പൈലറ്റുമാര്‍ സമരത്തില്‍ പങ്കെടുക്കും. എയര്‍ ലൈന്‍സിലെ ഓഫീസര്‍മാരുടെയും പൈലറ്റുമാരുടെയും ആനുകൂല്യങ്ങളില്‍ 50 ശതമാനം കുറവുവരുത്താന്‍ ഇന്നലെ ചേര്‍ന്ന എയര്‍ ഇന്ത്യ ഡയറക്ടര്‍ ബോര്‍ഡ് യോഗം തീരുമാനിച്ചിരുന്നു. ഇതില്‍ പ്രതിഷേധിച്ചാണ് പണിമുടക്ക് പ്രഖ്യാപിച്ചത്. ജീവനക്കാര്‍ക്കെതിരെ അച്ചടക്കനടപടിയെടുത്തതിന് ജറ്റ് എയര്‍വെയ്‌സിലെ പൈലറ്റുമാര്‍ നടത്തിയിരുന്ന സമരം ഒത്തുതീര്‍ന്നതിനുപിന്നാലെയാണ് എയര്‍ ഇന്ത്യയിലെ പൈലറ്റുമാര്‍ പണിമുടക്ക് നടത്തുന്നത്.